1-октябрь — Эл аралык карылар күнүнө карата Жан-Булак айыл аймагында улуу муунга урмат көрсөтүүгө арналган майрамдык иш-чара өткөрүлдү.
Иш-чарага Жан-Булак жана Достук айылдарынан 70 жаштан ашкан 155тен ашуун ата-эне чакырылып, алардын ичинен 80ден ашуун ардактуу карыя катышты. 
Майрамдын жүрүшүндө кадырлуу конокторго жылуу каалоо-тилектер айтылып, сый-урмат көрсөтүлүп, дасторкон жайылды. Ошондой эле алардын жаш муундарды тарбиялоодогу орду жана коомдун өнүгүшүнө кошкон салымы белгиленди. 
Майрамдык маанайды «Шайыр апалар» тобу жана маданият кызматкерлери тартуулап, ыр-күүлөрүн жана музыкалык чыгармаларын тартуулашты. Концерттик программа иш-чаранын көркүн ачып, катышуучуларга жагымдуу маанай тартуулады. 
«Карысы бардын ырысы бар, улуусу бар үйдүн куту бар» дегендей, карыяларыбыз — элибиздин тарыхын, нарк-насилин жана руханий баалуулуктарын сактап келген улуу муун. Алардын акыл-насааты, өмүр жолу жана ак батасы кийинки муун үчүн баа жеткис мурас болуп саналат.
Ардактуу ата-апаларыбызга чың ден соолук, узак өмүр, үй-бүлөлүк бакыт, тынчтык жана берекелүү карылык каалайбыз!
Кадырлуу карыяларыбыз аман болуп, айылдарыбыздын көркү жана үй-бүлөлөрүбүздүн куту болуп, ак батасын берип жүрө беришсин!Жан-Булак айыл өкмөтү
